Plantun de Prouvènço

Pèr coumpara dos planto d'encò nostre

Commelina communis & Aegilops cylindrica

Commelina communis

Commelinaceae

Noms en français : Comméline commune, Misère.

Descripcioun :
Aquesto misèro nous vèn d'Asìo e pòu s'escapa di jardin, pamens s'es pancaro espandido. Fai de poulìdi flour bluio mai que tènon pas gaire de tèms.

Usanço :
La misèro d'Asìo èi manjadisso, li jòuini brout en ensalado (chapla) e la planto cuecho. Dins li tèms de carestié se dis que li grano soun estado manjado. Ei peréu vertuouso contro li saunamen, li fèbre e la cagagno. Li japounés se n'en sèrvon pèr lucha contro lou mau de garganto (angino).

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Commelina
Famiho : Commelinaceae

Coulour de la flour : Bluio
Petalo : irreguliero
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Ribiero - Roubino
Estànci : Termoumediterran à Mesoumediterran
Couroulougi : Pancaro entresigna
Ref. sc. : Commelina communis L., 1753

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.